المقبل على الخطوبة والزواج كالمقبل على تجربة رهيبة محفوفة بالمخاطر والأهوال .. وقبل التورط وجب الاستعداد ... ولذلك اليك عزيزي الشاب هذه النصائح الثمينة قبل ان تتقدم للخطوبة او بمعني اصح قبل ان تقع الفاس فى الراس ..
- فى البداية وفى يوم زيارة العروسة حاول ان تأتى مبكراً قليلاً حتى تفحص اهل العروسة بدقة وتفحص وجوه المدعوين فاذا اصرت العروسة على انها تعزم عمتها وخالتها و بنت عمتها و بنت خالتها فاعرف يا عم انها من النوع المتشعب عائليا يعنى بمعنى تانى هتقول لك بعد الجواز . فرح بنت خالي ادفع ... فرح بنت عمتى ايدك على الهدية .. بنت عمي ولدت النهاردة ولازم ندفع النقطة علشان نستلم السبوع ومش بعيد تكون بتحب تغيظ قرايبها يعنى باختصار كل ما يشترى جوز بنت خالتها ازازة ريحة هتلف انت كل اسواق المحروسة علشان تشترى نفس النوع ونفس الطعم و فى الحقيقة النوع ده من الستات بتكون نهاية الرجالة على ايده حاجة واحدة و معروفة ومتكررة يا اما السجن يا اما الانتحار .
-
- دقق فى عبارات الام والاب فى اللقاء ... لو بعد ما شرحت لهم ظروفك رحبوا بيك بسرعة وانت عارف انهم متأكدين انك سنكوح وغلبان وسالف فلوس المواصلات يبقى لازم تعرف انهم سناكيح زيك ويبقى اتلم المتعوس على خيب الرجا .
-
- اذا كان عندك بنت صغيرة مدقدقة فى العيلة حاول انها تكون معاك فى زيارة اهل العروسة اول مرة .. هتسألنى
فايدتها ايه ؟ اقول لك ان البنت دى كنز استراتيجي تقدر تتجول بسهولة فى البيت وتوصل لاوضة العروسة من غير ما تلفت الانظار وهناك العروسة بتكون على طبيعتها فى الكلام والشتايم لاخواتها الخ الخ مع ملاحظة ان العروسة مش هتقدر تمثل كتير قدام البنت لانها بتمثل قدامك بالعافية ... كل المطلوب منك انك تحاول اول ما ترجع البيت تعرف من البنت معلومات عن العروسة والبيت على قد ما تقدر و هتسمعك اللى عمرك ما سمعته .
- اثناء اللقاء دقق فى قدم العروس وفى رقبتها او اى جزء ظاهر منها ... فاذا كانت القدم متشققة والرقبة عليها بقايا اسمرار فاعلم انها لا تستحم او ترتدى شبشب الحمام الا اذا زارها عريس و هنا يا معلم لو انت بخيل هتكون العروسة هنا عز الطلب لانها هتوفر عليك تمن الشباشب و الشامبو والشاور جيل والليفة الحجر .
-
- لا تنسى ان تنسى متعمداً جراب نضارتك او موبايلك بعد ضبط وضعيته على الصامت .. حاول انك ترجع لبيت العروسة فجأة بعد ساعة للبحث عن الجراب او التليفون ... و هناك هتتفاجيء بالكارثة بعد ان تم استبدال محتويات المنزل تماماً و قام اهل بإرجاع طقم الصيني وطقم الكراسي والشوك والمعالق والسكاكين اللى استلفوها من الجيران والادهى ان العروسة هتكون قامت بارجاع الفستان للجيران بعد ان قامت بكشط البوية من على خلقتها تماماً وحضرت عدة الشغل و رجعت لممارسة مهمتها الطبيعية فى تسييق الشقة وغسل الاطباق اللى لهطت انت فيهم الجاتوه يا نجم .
- وكل زيارة وانت طيب
